በስደት የቆዩ ዑለሞችን መመለስ አስመልክቶ ከ17ቱ የሙስሊም መፍትሄ አፈላላጊ ኮሚቴ የተሰጠ መግለጫ ቅዳሜ ሐምሌ 28 – 2010 || አዲስ አበባ – ኢትዮጵያ

በስደት የቆዩ ዑለሞችን

በአላህ ስም እጅግ በጣም ሩህሩህ፣ በጣም አዛኝ በሆነው! ሰላም እና እዝነት የነብያት መደምደሚያ፣ የዓለም እዝነት ለሆኑት ለምርጡ ነብይ ሙሐመድ እና ለቤተሰቦቻቸው፣ እንዲሁም ለባልደረቦቻቸው ይሁን! 

የጸጋ እና የንግስና ሁሉ ባለቤት ለሆነው፣ ከበዳዮች ግፍም ነፃ ላወጣን አላህ (ሱ.ወ) ምስጋና የተገባ ይሁን፡፡ የግፈኞችን መጨረሻ ውድቀት ላደረገው እና ሁሌም ሙእሚኖችን ለሚረዳው ጌታችንን ምስጋና የተገባ ይሁን፡፡ ቁርአናችን የአላህን ዲን ካገዝን አላህ ስኬትን እንደሚያጎናጽፈን በነገረን መሠረት የአቅማችንን ታግለን በእርሱ ችሮታ እና እዝነት ታላቅ ስኬትን ስላጎናጸፈን እናመሰግነዋለን፡፡ የኡማው የነገ ማንነት ቀራጭ የሆኑትን ዑለማዎቻችንን መሻኢኾቻችንን፣ ወንድምና እህቶቻችንን ለመግደል፣ ለማሰቃየት እና ከአገር ለማሰደድ ግፈኞች ያሴሩትን ሴራ በማምከኑ እናመሰግነዋለን፡፡ በጥቅሉ ለዋለልን ውለታ እና በእኛ ላይ ላደረገው ጸጋ ሁሉ ምስጋናችንን እያደረስን ላጎደልነው እና ላጠፋነው ሁሉ ይቅርታውን እንለምነዋለን፡፡

በደለኞች አላህ ጊዜ ሲሰጣቸው እና ሲታገሳቸው ላዩ ሲታይ ድል በሚመስለው ኃይላቸው እየተታለሉ ይሄዳሉ፡፡ እብሪትን ይላበሳሉ፡፡ ተበዳዮችም በበደለኞች ጊዜያዊ ኃይል ግራ ተጋብተው ትእግስታቸው እጅጉን እስኪፈተን ይደርሳሉ፡፡ አላህ (ሱ.ወ) በቁርአኑ ይህ ላይ ላዩን ድል መስሎ የሚታይ ኃይል እውነተኛ እና ዘላቂ አለመሆኑን፣ የበደለኞች ፍጻሜም የከፋ መሆኑን ነግሮናል፡፡ ይህንኑ እውነታም በሕይወታችን አሳይቶናል፡፡ የህዝበ ሙስሊሙን ዱዓ ሰምቶ ዛሬ ለምናየው ተጨባጭ አድርሶናል፡፡ ኢስላምን እና ሙስሊሙን ለማጥፋት ጥረት ሲያደርጉ የነበሩ ሰዎችን አዋርዶ መጨረሻቸውን አሳይቶናል፡፡ አልሐምዱሊላህ!

ምንም እንኳን መዝለል እና ማጠልሸትን መሰረት ያደረገው የታሪክ አዘጋገብ እውነታውን ለመጋረድ ቢጥርም እስልምና፣ ኢትዮጵያ እና ኢትዮጵያዊው ሙስሊም ያላቸው ቁርኝት ለህዝቧም ለአገሪቱም ኩራት መሆኑ ታሪካችንን በትክክል ባወቅን ቁጥር የምንረዳው አውነት ነው፡፡ ለአንድ ህዝብ በቁርአን እና በታላቁ ነብይ ሙሐመድ አንደበት በመልካም ከመወሳት የበለጠ ምን ክብር አለ?

ኢትዮጵያ የአለም ብርሃን የሆነውን ኢስላም እና ሙስሊሙን በመቀበል ቀዳሚ ሆና መገኘቷ መላውን የኢትዮጵያ ህዝብ የታላቅ ክብር ባለቤት አድርጎታል፡፡ አገራችን እና በጊዜው የነበረው ፍትሃዊ መሪ በታላቁ ነብይ አንደበት ተወድሰዋል፡፡ አገሪቷ ‹‹የእውነት አገር››፣ ንጉሷም ‹‹እርሱ ዘንድ አንድም የማይበደልባት ፍትሃዊ መሪ›› በሚል ተወድሰዋል፡፡ የኢስላም እና የኢትዮጵያን ትስስር ታላቅነት የምንረዳው ታሪክን ከማባከን ኋላቀርነት ወጥተን ታሪካችንን በአግባቡ መጠቀም ስንጀምር ቢሆንም እስከዛሬ ግን ይህ ታሪካዊ ትስስር የሚያስገኘውን ፋይዳ በአግባቡ ሳንጠቀምበት ቀርተናል፡፡

አገራችን ኢትዮጵያ ከኢስላም ጋር ብቻ ሳይሆን ከሙስሊሙ ጋር ያላት ትስስር እና ቁርኝትም ዳግም ህይወት ዘርቶ ጥቅም በሚሰጥ መልኩ ሊቃኝ የሚገባው አኩሪ ታሪክ ነው፡፡ ለመጀመሪያ ጊዜ ታላቋ ኢትዮጵያ የተመሰረተችው እና የኢትዮጵያ አንድነትም እውን የሆነው በሙስሊም መሪ እና በሙስሊሙ ማህበረሰብ ነው፡፡ ይህም ለአገራችን ታላቅ ውለታ ከመሆኑም በላይ የነገዋን ኢትዮጵያ ለማለምለምም ሆነ የታላቋን ኢትዮጵያ ልጆች አንድነትና ታሪካዊ ትስስር ለመፍጠር ጠንካራ መሰረት እንደሚሆን መገመት አያዳግትም፡፡

ኢትዮጵያውያን ሙስሊሞች በአንድ ዘመን ገንብተውት የነበረው በስነ-ምግባር የተጌጠ ባህል፣ የገነቧቸው ሱልጣኔቶች እና በቋሚነት ያሰፈሩት የስልጣኔ ፋና እንደ ታሪክ ለአገር ኩራት ከመሆኑም በላይ ተገንብተውና ተስተናግደው ከማለፋቸው አንጻር ደግሞ ውበት ሆኖም ያገለግላል፡፡ በሂደት ሙስሊሞች በአገሪቱ እጣ ፈንታ ላይ የወሳኝነት ሚናቸውን በማጣታቸው አገራችን አሁን ላለችበት ኋላቀርነት እና ውድቀት ተዳርጋ ቆይታለች፡፡

አንድም ሰው የማይበደልበት የፍትህ ስርዓት ባለቤት የሆነ ንጉስ የነበራት፣ በነብያችን አንደበት ‹‹የእውነት ምድር›› የሚል ምስክርነት የተሰጣት አገራችን የንጉሳንና የገዢዎች ግፍ ሰፍኖባት ለመኖር ተገዳለች፡፡ በሂደትም በግፍ እና ጭቆና የምትታወቅ የምድራዊ ችግር ተምሳሌት እስከመሆን ደርሳ የነበረበት ዘመን የቅርብ ጊዜ ትውስታ ነው፡፡ ስደተኞችን በፍቅር እና በፍትህ ታስተናግድ የነበረችው ውዷ አገራችን ዜጎቿ በችግር እና በግፍ ያለማቋረጥ የሚሰደዱባት አገር ሆነች፡፡ ዑለሞቻችን፣ መሻኢኾቻችን፣ ምሁራኖቻችን እና ወጣቶቻችን ቀደምት ሙስሊሞች ሲሰደዱ አቅፋ የተቀበለችና ያስተናገደች አገራቸው ገፍታ አባርራቸው ለረጅም ዓመታት ተሰደዱ፡፡ ባለፉት ሶስት አስርት ዓመታት በመንግስት ጣልቃ ገብነት ምክንያት በርካታ ዑለሞች፣ ምሁራን እና ባለሙያዎች በስደት ዓለም ለመኖር ተገድደው ቆይተዋል፡፡ 

ዛሬ ግን የአላህ (ሱ.ወ) ፍቃድ ሆኖ ሙስሊሙ ማህበረሰብ ላለፉት ሰባት ዓመታት ከልቡ አላህን ሲማፀን የነበረው ዱዓ ተቀባይነት አግኝቶ ‹‹ስደቱም እስሩም ይብቃህ›› የተባለበት ዘመን ላይ ደርሰን አንጋፋው ዓሊም ሸኽ ሰዒድ አህመድ ሙስጠፋን እና ሌሎች ሁለት ታላላቅ ዑለሞችንም ለመቀበል ዝግጅት እያደረግን እንገኛለን፡፡

ጠቅላይ ሚኒስትር ዶክተር አቢይ አህመድ እያደረጉ ያሉት የጥላቻን ዘር የመንቀልና በአብሮነት መንፈስ የመተካት ሂደትና አጠቃላይ አገራዊ ለውጥ ተከትሎ ታላቁ ዓሊም ሸኽ ሰዒድ አህመድ ሙስጠፋ የደመቀ አቀባበል ተደርጎላቸው በነገው እለት ወደ አገር ይገባሉ፡፡ ሸኸ ሰዒድ አህመድ ሙስጠፋ ከ23 አመታት በፊት የሙስሊሙን የዲን እውቀት ለማጎልበት እና ሚናውን ለመጨመር ባደረጉት ጥረት ምክንያት መንግስት በሙስሊሙ እና በሚመሩት ድርጅት ላይ ጥቃት እና እስራት በመሰንዘሩ ውጭ አገር በሄዱበት ሳይመለሱ በስደት ለመቆየት ተገደው ነበር፡፡ ምንም እንኳን ለኢስላም እና ለሙስሊሙ የከፈሉት መስዋእትነት ሊያበረከቱት ከሚመኙት አንፃር ለእሳቸው ያነሰ መስሎ ቢታያቸውም ለእኛ ግን ትልቅ ትርጉም ያለው ነው፡፡

ሸይኽ ሰዒድ አህመድ ሙስጠፋ የቀድሞ የኢትዮጵያ ሙስሊም ወጣቶች ድርጅት መስራችና ሊቀመንበር፣ የኢትዮጵያ ሙስሊም ዑለማዎች ማህበር አባል፣ በሃጂ ሙሀመድ ሳኒ ሐቢብ ዘመን የኢትዮጵያ ሙስሊሞች የዳዓዋና የፈትዋ ኮሚቴ አባል፣ የኢትዮጵያ ቅዱስ ቁርአን ማኅበር አባልና በአሁኑ ወቅት ደግሞ በዲያስፓራ የኢትዮጵያ ሙስሊሞች አንድነት የበላይ ጠባቂ ሆነው አገልግለዋል፡፡ አላህ በአጠቃላይ በሰው ልጅ ላይ፣ በተለይ ደግሞ በዑለሞች ላይ የጣለውን አማና እና ኃላፊነት በአግባቡ ተረድተው ኃላፊነታቸውን ለመወጣት ከሚጥሩ ዑለሞች አንዱ በመሆናንም ይታወቃሉ፡፡ 

ሸኽ ሰዒድ በዒልም ዘርፍ ካበረከቱት አስተዋጽኦ በተጨማሪም በሙስሊሙ የመብት ማስከበር እንቅስቃሴ ላይ ሚና እንደነበራቸው ይታወቃል፡፡ በእንዲህ ዓይነት ፈታኝ እና ወሳኝ ወቅት ከሐቅ እና ከህዝብ ጎን የሚቆም ዓሊም እና ምሁር ማግኘት ምን ያህል ከባድ እንደሆነ በአገራችንም ሆኑ በሌሎች አገራት የተደረጉ የለውጥ እንቅስቃሴዎችን በማየት መገንዘብ እንችላለን፡፡ ከዚህ አንጻር ሸኻችን በ80ዎቹ ሙስሊሙ ማህበረሰብ ሲያደርጋቸው በነበሩ እንቅስቃሴዎችም ሆነ ላለፉት 7 ዓመታት በተደረገው የመብት ንቅናቄ ያበረከቱት አስተዋፅኦ እና መስዋዕትነት ለዲናቸውና ለህዝባቸው ያላቸውን ቀናኢነት፣ ለውጥን በሚመለከት ያላቸውን ብስለት እና ድፍረት የሚያሳይ ማስረጃ ነው፡፡ ህዝባቸውን የበለጠ ለማገልገል ወደአገራቸው መመለሳቸው እጅጉን የሚያስደስተንም ለዚህ ነው፡፡

ነገ ጠዋት ሐምሌ 29 – 2010 ወደአገራቸው የሚገቡት ሸኽ ሰዒድ ብቻ አይደሉም፡፡ አስቀድመን እንደጠቀስነው ሌሎች ሁለት ዑለሞችም አብረዋቸው ይገባሉ፡፡ አንደኛው በስደት ከአገራቸው ከወጡ ከ40 ዓመታት በላይ የቆዩትና ባሉበት አገር ሸሪዓንና እስላማዊ ታሪክን በማስተማር ልዩ ዝናን ያተረፉት፣ እንዲሁም በአሁኑ ወቅት በዲያስፖራ የኢትዮጵያ ሙስሊሞች አንድነት ምክትል የበላይ ጠባቂ የሆኑት ታላቁ ዓሊም ሸኽ ጃቢር አብደላ ናቸው፡፡ ሁለተኛው ደግሞ በጅማ ክፍለ አገር ከጎማው ሙፍቲ ሙሐመድ ዓሊ ያህያ የቀሩት እና የሙፍቲው ልዩ ተማሪ የነበሩት ሽኽ ሙህዪዲን ሸሪፍ ናቸው፡፡ ሸኽ ሙህዪዲን በሳዑዲ የጃሚዓ ትምህርታቸውን ካጠናቀቁ በኋላ በሳኡዲ ዓረቢያ መጅሊስ አል ሹራ የበላይ ኃላፊ ስር በሚተዳደረው የከፍተኛ እስላማዊ የጥናትና የምርምር ቢሮ ባለማእረግ ተመራማሪ ሆነው እያገለገሉ ቆይተዋል፡፡ 

ከሦስቱ ታላለቅ ዑለሞች በተጨማሪ ሌሎችም የኢትዮጵያ ሙስሊሞች አንድነት አባላት በነገው እለት በጋራ ወደ አገር የሚገቡ በመሆኑ ሁላችንም ኢስላማዊ ስነ-ስርአት በተላበሰ መልኩ የኢስላምና የሙስሊሙን መልካም ገፅ ሊያሳይ በሚችል መልኩ አቀባበል እንድናደርግላቸው በአክብሮት እንጠይቃለን፡፡ ዑለሞችን ማክበር የእስልምና አስተምህሮ አንዱ ክፍል እንደመሆኑ መጠን መላው ሙስሊም ማህበረሰብ እኒህን ታላላቅ አባቶች በአክብሮት ተቀብሎ በቀጣይም መልካም መስተንግዶ እንደሚያደርግላቸው እምነታችን ነው፡፡

ከዚሁ ጋር ተያይዞ  በሙስሊሙ የመብት እንቅስቃሴ ምክንያት ለስደት የተዳረጉ ዑለሞቻችን፣ ኡስታዞቻችን እና እንደ ዓሊ መኪ ያሉ ለትግሉ ትልቅ መስዋእትነት የከፈሉ ወንድሞቻችንን ሁሉ አላህ ወደ ውድ አገራቸው እንዲመልሳቸው፣ በቅርቡ በፍቅር እና በሰላም እንዲያገናኘንም አጥብቀን እንለምነዋለን፡፡

አላሁ አክበር!

Latest News

video image video image video image Read More

Get Connected

logo link youtube logo link twitter logo link facebook

Contact Information