ከሙስሊሙ መፍትሄ አፈላላጊ ኮሚቴ የተሰጠ መግለ

ለክቡር ዶ/ር አብይ አህመድ የኢ/ፌ/ዴ/ሪ ጠቅላይ ሚኒስትር
አዲስ አበባ
ጉዳዩ፡- ለህዝበ ሙስሊሙ ጥያቄዎች መልስ የመስጠት ተነሳሽነትዎን ይመለከታል፤
የተከበሩ ጠቅላይ ሚኒስትር…

image

በሰኔ 8/2010 በዒድ አልፈጥር በዓል እለት በተለያዩ አገራዊ ጉዳዮች ላይ መግለጫ መስጠትዎ ይታወቃል። በመግለጫዎ ለወቅታዊ የአገራችን ፓለቲካዊ ትኩሳቶች እልባት ለመስጠት እንደሚሰሩ እና በተለይም የህዝበ ሙስሊሙን ማንኛውንም ጥያቄዎች ለመመለስ ዝግጁ መሆንዎን መግለፅዎ በህዝበ ሙስሊሙ ውስጥ አዲስ ተስፋ የፈጠረ አጋጣሚ ሆኗል።

እኛ ኢትዮጵያዊያን ሙስሊሞች ላለፉት ዓመታት መንግስት ከሁሉም ሃይማኖቶች በእኩል ርቀት ነፃ እና ፍትሐዊ በሆነ አግባብ መቆም ሲገባው በሙስሊሙ ተቋማት እና የእምነት ጉዳዮች ውስጥ በግልፅ ጣልቃ በመግባቱ የተነሳ የመነጩ የመብት ጥሰቶችን በሰላማዊ መንገድ ለመቃወም እና ለመታገል አደባባይ ከወጣን ስድስት ዓመታት ተቆጠሩ። በሙሉ የአገራዊ ሃላፊነት ስሜት እና ኢትዮጵያ አገራችን የሁሉም እምነቶች እና የሃይማኖቶች መብቶች የተከበሩባት ሆና ማየትን በማለም ያደረግነው ሰላማዊ ትግል እነሆ ለመሰል ትግሎች በር ከፍቶ የለውጥ ቀንዲል መሆን ቢችልም ህዝበ ሙስሊሙን ግን ያለ ስሙ ስም፣ ያለ ግብሩም የከፋ ስቃይ እና መከራ እንዲደርስበት አድርጓል።

እነዚያ አመታት አልፈው በአገሪቱ ፈጣን የፓለቲካ ለውጦች ቢስተናገዱም ያነሳነው ጥያቄ መልስ ሊያገኝ እንደሚችል የሚጠቁም የአመለካከትም ሆነ የተግባር ፍንጭ ማየት ሳንችል እስካለፈው የረመዳን ፍች በዓል ድረስ ቆይተናል።

ክቡር ጠቅላይ ሚኒስትር…
መንግስትዎ እና ያዋቀሩት ካቢኔ በዓይነቱ የተለየ እና ለአገራችን ታሪክና ለህዝባችን ክብር የሚመጥን ምክንያታዊ ፓለቲካ ማራመድ በመጀመሩ መንግስትዎ ሰፊ ተቀባይነትን ማግኘት ችሏል። የዚህን ቅቡልነት ምንጭ ጠለቅ ብለን ስንፈትሸው በዋናነት የምናገኘው ለህዝቦች ማንነት፣ አገራዊ ድርሻ እና ኃላፊነት በሚመጥን መልኩ ከላይ ከአመራሩ የታየው የአመለካከት ለውጥ ሆኖ እናገኘዋለን።
ክቡር ጠቅላይ ሚኒስትር…

ከላይ በተጠቀሰው መግለጫዎ የህዝበ ሙስሊሙን ማንኛውንም ጥያቄ ለመፍታት ያለዎን ዝግጁነት መግለፅዎን በሁለት መሠረታዊ ምክኒያቶች በመልካምነት ተቀብለነዋል። በመጀመሪያ ለዓመታት በፅናት እንደ ህዝብ ዋጋ ስንከፍልለት የኖርነው ጥያቄ ደጋግመን እንደምንለው ያልተመለሰ ጥያቄ መሆኑን እውቅና መቸሩ ነው። የጥያቄያችን አለመመለስ ሳያንስ ጥያቄያችን ተቀልብሶ የሚዲያ ፕሮፖጋንዳ እና የሃይል እርምጃ ሰለባ ተደርገን ከመቆየታችን አንፃር ላልተመለሰው ጥያቄያችን እልባት ለመስጠት የመጀመሪያው እርከን የሆነውን ‹‹ህዝብ ያልተመለሰለት ጥያቄ አለው›› ብሎ የሚነሳን መሪ ዕውቅና ስንሰጥ ችግሩን በሚገባ የተረዳ መሪ ለመፍትሄውም ቁርጠኛ እንደሚሆን ስለምናምን ነው።

ተነሳሽነትዎን በበጎ የወሰድንበት ሁለተኛው ምክንያት ችግሩን ከስሩ የመፍታት አቅም እንዳለዎ በማመን እና በመግለጫዎም ይህንኑ በመጠቆምዎ ነው። በሁለት ወራት የስልጣን ላይ ቆይታዎ እዛም እዚህም ለሚነሱ ጥያቄዎች እሣት የማጥፋት ስራ ሳይሆን እንደ መንግስት ለህዝብ ጥያቄ ሊኖር የሚገባውን አመለካከት ስር ነቀል በሆነ መልኩ በመቀየርዎ ችግሮቹ በአፈፃፀም ደረጃ በቀላሉ የሚፈቱበት አየር እየተፈጠረ መሆኑ ግልፅ ነው። ህዝበ ሙስሊሙ ላነሳቸው ጥያቄዎች መልስ ማግኘት ያልቻለው የመሪ ድርጅቱ (መጅሊስ) መዋቅር ውስብስብ ሆኖ ሣይሆን መንግስት በጉዳዩ ላይ የያዘው አሉታዊ አቋም በመኖሩ ነበር።

በመሆኑም መንግስትዎ ማንኛውንም ችግር በመወያየት ለመፍታት ዝግጁ መሆኑን በሚዲያ ማሳወቁ ቀጣዩ ሂደት አተገባበር እንደሚሆን ይታመናል። የአሁኑን መግለጫ እንደ ከዚህ ቀደሞቹ ጊዜያዊ የፓለቲካ ግለት ማብረጃ ሳይሆን ወደ መሬት ወርዶ የሚተገበር እንደሚሆን እናምናለን። በዚህም ምክንያት አተገባበሩ ለጥያቄዎቹ መሠረታዊነት፣ ህዝቡ ካደረገው ሰላማዊ ትግል እና መንግስትም ለህዝብ ፍትሃዊ ጥያቄዎች ከሚሰጠው ዋጋና ክብደት አንፃር ተመጣጣኝ በሆነ ሂደት እና ጥልቀት እንዲከናወን እንፈልጋለን፤ አጥብቀንም እንጠይቃለን። ችግሮቹ በሙሉ የመንግስትን ትኩረት በሚያመላክትና የባለመብቶቹን ሥነልቦና ሊያረካ በሚችል መልኩ ይፈቱ ዘንድ የበኩላችንን ለማበርከት በህዝበ ሙስሊሙ ተወክሎ ሲንቀሳቀስ እንደነበረ የመፍትሄ አፈላላጊ ኮሚቴ ዝግጁነታችንን ስንገልፅ የጥያቄዎቹ መመለስ እና የሚመለሱበት መንገድ መሰረታዊ በሆነ መልኩ የተሣሠሩ እንደሆኑ በማስታወስ ጭምር ነው። ይህንን የምንለው ለችግሩ የሚሰጠው መፍትሄ ዘለቄታዊነቱ አስተማማኝ የሚሆነው የጉዳዩን ባለቤት እና ግንባር ቀደም ባለድርሻ አካላት ባሳተፈ መልኩ በሚደረግ ቀጥተኛ ውይይት ሲካሄድ በመሆኑ ነው።

በመጨረሻም በአገራችን ላይ አንዣቦ ከነበረው አስፈሪ አደጋ በተወሰነ ደረጃ እያገገምን ባለንበት በዚህ ወቅት የለውጥ ሂደቱን የሚያደናቅፉ ክስተቶች እዚህም እዚያም እየተስተዋሉ በመሆኑ ህዝበ ሙስሊሙ ከሌሎች ኢትዮጵያዊያን ጋር በመሆን ለመንግስትዎ ሁለንተናዊ ድጋፉን እንደሚቀጥል ልናረጋግጥ እንወዳለን።
ለህዝቦች ጥያቄ መልስ የመስጠት ሂደት ውስጥ እንድንገባ ላደረገን አላህ ምስጋና እያቀረብን እየተወሰዱ ላሉ ፖለቲካዊ እርምጃዎች አክብሮታችንን ለመግለፅ እንሻለን። መንግስታዊ ብልሹ አስተሳሰብና አሰራር የፈጠሯቸውን ችግሮች በመንግስታዊ እና ህዝባዊ ወገንተኝነት ለመፍታት በሚደረገው ጥረት በራሳችንም ሆነ ከሌሎች የአገራችን ህዝቦች ጋር በመሆን ለስኬታማነቱ የበኩላችንን እንደምንወጣ እየገለፅን ለሃገራችን እና ለክቡር ጠቅላይ ሚኒሰትራችን መልካሙን ሁሉ እንመኛለን። አገራችን ኢትዮጵያን አላህ የሰላም፣ የፍትህ፣ የነፃነትና የብልፅግና አገር ያድርግልን! አሚን!
የኢትዮጵያዊያን ሙስሊሞች መፍትሄ አፈላላጊ ኮሚቴ
አላሁ አክበር!

Latest News

video image video image video image Read More

Get Connected

logo link youtube logo link twitter logo link facebook

Contact Information